Licenciado en Física (especialidade de Física de Partículas) pola Universidade de Santiago de Compostela (USC) e doutor en Matemáticas, con premio extraordinario, pola mesma universidade. Desde 2003 é profesor da Área de Astronomía e Astrofísica do Departamento de Matemática Aplicada da USC no campus de Lugo. Actualmente imparte docencia no Grao en Robótica da Escola Politécnica Superior de Enxeñaría e no Mestrado en Matemáticas da Facultade de Matemáticas. A súa actividade investigadora, recollida en diversas publicacións, está centrada no estudo da dinámica orbital dos sistemas estelares e planetarios: cálculo de órbitas, análise da estabilidade, evolución secular... Outro dos seus intereses de investigación é a integración analítica de sistemas hamiltonianos, campo no cal ten desenvolto un método n-paramétrico de perturbacións baseado en transformacións de Lie. A máis recente liña de investigación en que está a traballar é a dinámica de meteoroides e asteroides e o cálculo das súas eventuais traxectorias atmosféricas. É membro de varias comisións da Unión Astronómica Internacional, da Sociedade Española de Astronomía e do Centro de Investigación e Tecnoloxía Matemática de Galicia.

M4 Ciencia e Coñecemento. Dinámica e fenómenos complexos, M4 Ciencia e Coñecemento. Estruturas naturais, M4 Ciencia e Coñecemento. Análise matemática de datos